Ges de disnar non for'oimais maitis,
Qui agues pres bon ostau
E fos dedinz la carns e.l pans e.l vis
E.l focs fos clars cum de fau.
Lo plus rics jorns es huoi de la setmana
E degra m'estar soau!
C'aitan volgra, volgues mon pro na Lana
Cum lo seigner de Peitau.

Per saludar torn entre.ls Lemozis
Cellas qui ant pretz cabau.
Mos Bels Seigner e mos Bels Cembelis
Qieiron oimais qui las lau,
Q'ieu ai trobat del mon la plus certana
E la genssor c'om mentau.
Per que s'amors m'es tant cotidiana
Q'a las autras mi fai brau.

Gens joves cors, francs e verais e fis,
D'aut paratg'e de reiau,
Per vos serai estrains de mon pays
E.m mudarai part Angau.
E car etz tant sobr'autras sobeirana,
Vostra valors n'es plus au.
Q'onrada n'er la corona romana
Si.l vostre caps s'i enclau.

Ab doutz esgar qe.m fetz et ab clar vis
Mi fetz amors son esclau.
E mos seigner m'ac pres de lieis assis
Son brun feltr'emperiau
E.il paraula fon doussa et humana
E.il dich cortes e soau.
E de solatz mi semblet Catalana
E d'acuillir de Fanjau.

Al gen parlar qe.m fetz et al bel ris
Qan vi las denz de cristau
E.l cors graile, delgat e fresc e lis,
Trop benestan en bliau -
E la colors fo fresca e rosana -
Retinc mon cor dinz sa clau.
Mais aic de joi que qi.m des Corrozana
Car a son grat m'en esgau.

De totas es na Maier sobeirana
De qant mars e terra clau.