Dompna, puois de mi no.us cal
E partit m'avetz de vos
Senes totas ochaisos,
Non sai on m'enqieira!
Que ja mais
Non er per mi tant rics jais
Cobratz, e si del semblan
Non trob dompn'a mon talan
Qe.m vailla vos q'ai perduda,
Ja mais non vuoill aver druda.

Pois no.us puosc trobar engal
Que sia tant bella ni pros
Ni sos rics cors tant joios,
De tant bella tieira
Ni tant gais,
Ni sos rics pretz tant verais,
Irai per tot agaran
De chascun' un bel semblan
Per far dompna soiseubuda,
Troi vos me siatz renduda.

Fresca color natural
Pren, bels Cembelins, de vos
E.l doutz esgart amoros!
E fatz gran sobrieira
Car ren lais,
C'anc res de ben no.us sofrais.
Midonz na Elis deman
Son adreich parlar gaban,
Qe.m don a midonz aiuda!
Pois non er fada ni muda.

De Chales la vescomtal
Vuoill qe.m done ad estros
La gola e.ls mans amdos.
Pois tenc ma carrieira,
No.m biais,
Vas Rocacoart m'eslais
Als pels n'Agnes, qe.m dara.n!
Qu'Iseutz, la dompna Tristan,
Que fon per totz mentauguda,
No.ls ac tant belz a saubuda.

N'Audiartz, si be.m vol mal,
Vuoill qe.m don de sas faissos,
Qe.il estai gen liazos,
E car es entieira,
C'anc no.is frais
S'amors ni.s vols en biais.
A mo Mieils-de-ben deman
Son adreich nou cors prezan,
De que par a la veguda
La fassa bon tener nuda.

De na Faidid' atrestal
Vuoill sas bellas denz en dos,
L'acuillir e.l gen respos
Don es presentieira
Dinz son ais.
Mos Bels Miraills vuoill qe.m lais
Sa gaiez' e son garan,
E car sap son bel estan
Far, don es reconoguda,
E no s'en cambia ni.s muda.

Belz Seigner, eu no.us qier al
Mas que fos tant cobeitos
D'aqesta cum sui de vos!
C'una lechadeira
Amors nais,
Don mos cors es tant lechais.
Mais vuoill de vos lo deman
Qe autra tener baisan.
Doncs midonz per qe.m refuda,
Pois sap que tant l'ai volguda

Papiol, mon Aziman
M'anaras dir en chantan
C'amors es desconoguda
Sai e d'aut bas cazeguda.