Sel qui camja bon per meillor,
Se.l mielz prent, ben deu mais valer.
Q'eu ai cor e Dieus do.m poder
Que tant serva.l mielz e aor
Que de l'ir'e de la dolor
O.m mes sil que.m degra valer
Qui.m trait e cuget m'aucire
Plaza.il que.m torn en bon esper.
Qu'enves mi no.is pot escondire
C'al sieu tort no.m dones lezer.

Lemozin, ben vos deu plazer
C'ara es vengutz Meilz de Be.
Tant quant mars clau ni terra te,
Non a domn'on puosca caber
Lo bes qu'om pot en leis vezer!
No.i a joi qui de lleis no.l te.
Qu'ella sap tan gen far e dire
Tot so qu'a bon pretz aperte
C'ab son joi fai los iratz rire
Tan avinentmen se capte.

Aquesta vos dic qe mante
Pretz e joi, tant ama.n honor
Joven e solatz et amor
Et acuoill, don n'a e rete
Grat de totz cels qui se conve.
Per que tuit sei corteiador
Parton denant lei ab desire,
Tant lor a sos vezers sabor,
C'om no la ve que non conssire
C'anc de sos oilz non vi jensor.

Et a.m covenguda s'amor
Can volra cavallier aver.
Qe cel qui mais sabra valer
Soffrira per entendedor.
Et er ben malvatz qui non cor
Al cors on hom met tant d'aver
Que.l Meillz c'om puosc'el mon eslire
Pot gazaingnar e conquerer,
S'es larcs et adreitz e servire
E sap far e dire plazer.

Guilleme Bertram, fai saber
Per tot aquest dir de part me
E qui pros er, esforz'en se,
Paubre e ric segon poder,
Qu'ella volra son dig tener.
Qe cel on mais volra de be
N'aura guierdo ses desdire
...........................
Qu'en tal loc vol son Joi assire
............................

Guillem, a Torena vai dire
A.n Bos qe.is capteingna tan be
C'om puosca d'uoi enan eslire
Qe Amors de son joi l'estre.