Gent part nostre reis liouranda,
Per so son tuit gras
Sei Engles, e nou e ras,
E chascus porta guirlanda.
E Frances son roillos
De portar lai garnizos,
E soffront fam e set e ploi'e ven.
E.l reis conquier l'autrui e.l seu defen.

Reis que gran terra demanda
Par qe fassa gas,
Quan qavau non trai de pas,
Ni chausa de fer non randa.
Ben fe.l reis, qu'es coraios,
Car venc sai entre.ls Bretos.
Mas cel'honors tornara a nien
S'es tals la fis com fes comensamen.

Guerra vol c'om sanc espanda,
E c'om foc n'abras,
E que ja non sia las
De donar, n.i meta ganda.
Q'eu sei fraires aitals dos,
L'us es reis, l'autre coms pros.
Mas ges non ditz vertat aicel que men,
Ni tort lauzat no son pro ni valen.

Als baros, que argens blanda,
Sirventes, diras
Q'enanz que passon lo pas
Veion si l'er foudatz granda,
Si l'er sens o danz o pros!
Car per seingnor dormillos
No voill intrar en guerra ni.n conten,
Car greu conquier hom ben terra dormen.

Breton son for de garanda
E son d'onor bas,
Car uns coms de San Tomas
Entret en Broselianda.
Ben paron de bon cor blos
E tornat de sus en jos,
Car lor Artus demandon freolmen.
No.n dirai plus, car negus no m'enten.

Sirventes, vai t'en cochos
Al comte c'a nom n'Ugos,
Car el val tan, e ve, e sap, e sen,
Que ja no vol penre malvatz argen.