Can mi perpens ni m'arbire
Q'eu son, ni de cal part veng,
Meravil me mot e.m seing
Con Dieus volc esser soffrire
Tan lonjamenz dels mieus torz.
Mas Cel q'es verais e forz,
Pos li plaz c'a lui me vire,
Deing asi.l peccat ausire
Com mos mals talans es morz.

Be.s vol de tot be devire
Qui contra Dieu pren nuil geing,
Qe Dieus non vol c'om l'enseing.
Cuidavam passar ab rire
Per nostres nescis deporz.
Fraire, per pauc loncs acorz
No nos fes trop tart assire
Tantost deu hom far con dire
Lo ben, c'ades vai hom morz.

Que es hom, qant m'o cossire,
Ni qe val en ren no.m teing.
E doncs rics per qe si feing
Es rics anz n'es trop a dire,
Aitan es freols l'eforz
Lo jorn c'om passa los porz
On van tut, ses contradire.
Cals qe.s fassa gais ni.s mire,
A toz es comunals morz.

Lo Seingnor, qui es complire
De toz jois, prec c'ab nos reing.
Alas del cor co m'estreing,
Cant mi membron li sospire
Deslials e fals conorz.
Mas ar si camja ma sorz
En ben, per que no.m n.aire.
Tals n'er ben leu escarnire,
Q'eu soi vius et el n'er morz.

Pos Dieus volc sofrir martire,
Ja nos no n'aiam desdeing,
C'ab atretal entreseing
Nos a traiz uns traire,
Saludan! don desconorz
No m'es, c'al deabl'estorz
Soi ab tan, cui foi servire!
Non a poder plus qe.m tire,
Per que no.m fa paor morz.

Folquet, si ses contradire
Crezes so qe.us auci dire,
No m'agra fag paor morz.

Mas a Sel en soi grazire
Que, per nostra mort ausire,
Deignet esser en croc morz.