Volontiers fera sirventes,
S'om bo volgues ausir chantar,
Que pretz es mortz, honors e bes,
E se lo pogues revenjar
Tanz n'i agra que mortz que pres
Que si fins del mon no.i vengues
Tanz no.n pogran aigas negar
Ni tuit li foc del mon cremar

Si non es tortz ni nesies
So qu'en chantan m'oez contar
Car Diu dona la rend'e.l ses,
Qu'El s'en deia saber guidar
Segon que ll'om e ll'avers es.
Mas ses mesura non es res.
Aisel que.s vol desmesurar
No pot sos faitz en aut poiar.

Regisme son, mas rei no jes!
E contatz, mas non comt ni bar!
Las marchas son, ma no.il marqes,
E.ill ric castel, e.ill beill estar,
Mas li castellan no i sso.
Et avers es plus c'an non fo!
Pros an condutz e pauc manjar,
En colpa d'avol ric avar.

Bellas personas, bels arnes
Prodom pot veder e trobar,
Mas no.i es Augier lo Danes,
Berrautz ni Baudui no.i par.
E de pel penzenat son pro,
Rasas denz ez en cais greno,
Mas non ges el que sapch'amar,
Cort tener, domneiar ni dar.

Si flaca gen on so.ill cortes
Que solon castels aseiar,
E que solon, sesman'e mes,
Cort mantener ab gen reingnar,
E que solon donar rics dos
E far las autras mesios
A soudadier et a guglar
Un sol on vei so autz contar

Si.l reis Felips, reis dels Frances,
A volgut a Richart donar
Gisort, aut loc ez aut paes,
Richart l'en deu fort merceiar.
Mai si Felips del mieu cor fos,
Richart no mouria.ls talos
A son dan senes en contar,
E puois no.ls vol laisser ferrar.

Papiol, tu sias cochos,
Di.n en Richart qu'il es leos,
E.l reis Felips agnels me par,
Q'aisi.s laissa desiritar.