Anc no.s poc far maior anta
Can m'acols
E mi pres en dols.
E pois ill o a enquest,
Mi non es greu s'il m'esclava
Ni.m n'irais.
Ni m'es danz
Si.ls autrui enfanz
Colg'el meu bressol
Q'eu sui granz

Fatz cors, puois ella t'encanta
Tu t'o cols,
Que faitz i que fols
Quar de tot joi si desvest
E de pretz se cur'e.is lava,
Per lei mais
Lo bubanz
Remagn'e.l mazanz.
Q'eu o voill, si.l vol,
Dos aitanz

Se.l seingner de cui es Manta
E Murols
Fos premiers terzols
Tornatz, ab que sai non rest
E fora seus, si.s n'anava
Lai, Roais,
Trevaganz,
Alaps e Aranz.
Pois fera fillol
Dels Persanz.

Entre Dordoign'e Charanta
Es trop mols
:so.m dis n'Auraiols,
Qu'enquier re no.i a conquest.
Et er l'anta si.s pausava,
Qu'aisi lais
Benananz
E gortz e tiranz
Sels c'amar no sol,
E poisanz.

Enaps e copas mazanta
Et orzols
D'argen e pairols,
E sec riveir'e forest,
E sai toli'e donava.
No.s biais
Dels affanz--
Preisas e mazans,
Gerra e tribol
Jen sonanz.

Vas mon Oc e Non t'avanta,
Papiols,
De cui es Bristols,
Niortensems e Susest
E Londres e Titagrava
E Carais
E Roanz,
Eboras e Ganz.
Pos tot a can vol,
Sai s'eslanz

Mariniers, enjanz
Es c'amar destol
Als amanz.

Bel seingner, truanz
Seres si no.us dol
Le meus danz.