S'ieu fos aissi segner ni poderos
De mi meteis, qe no.m tengues amors
Ni m'agues si del tot en son poder,
Ben feira tant tro qe feira saber,
Del rei Felip, qals dolor e cal dan
E qals dols es, qar el non es ben pros,
E qar Peiteu vai si Franza merman.

E s'aissi pert sos dreitz mentr'el es tos,
Lors qant er veils degr'esser vergoignios.
Ni ja Frances no.i haian bon esper
Q'el obs lur es, per qe'l deion temer!
Non prezon re lur ditz ni lur deman!
Zai en Peiteu enan s'en fan janglos
Qant son ensems en Richars e Bertran.

Es en Richartz chass'ab lebres leos
Qe no.n reman per plan ni per boissos,
Enan los fai dos e dos remaner
Per plan effortz, qar no s'auzon mover!
E cuda ben penre deserenan
Las grans aiglas ab los esmeirillos,
Et ab buzat metr' austor en soan.

E.l reis Felip chassa sai ab falcos
Los passeretz e.ls menutz auzelos
E.il sei home non l'auzon dir lo ver:
Qe pauc e pauc si laisson jus chaser,
Qe.l cons Ricars li ha tolgut ugan
Engolesme, don si fai poderos,
E Tholosa, qe.il tol sobre desman.

E pueis per terras non torna iros
Membre.l sa sor e.l marit ergulhos,
Qe.il ha laissat, qe non la vol tener -
Aqest forfaitz mi sembla desplazer -
E tot ades qe vaia pejuran,
Qe.l reis navars l'a donat ad espos
A sa filha, per qe l'ant'a plus gran.

Mas vengues sai ab las novellas flors,
Qe lur bobanz chaira de sus en jos,
Ni ja Gascos no.i poiran pro tener
Que no tollam lo mon pres San Sever
E Rochafort, e qant tolgut nos an,
Si q'en Peitau sia nostres brandos
Gent alumnatz, si qe tuit lo veiran