Non puosc mudar mon chantar non esparga,
Pois n'Oc e Non a mes fuoc e traich sanc!
Car grans gerra fai d'escars seignor larc,
Per qe.m plai ben dels reis auzir la bomba.
Qe n'aion ops paisson, cordas e pom,
E.n sion trap tendut per fors jazer,
E.nz encontrem a milliers et a cens,
Si c'apres nos en chant hom de la gesta.

Q'ieu n'agra colp receubut en ma targa
E faich vermeil de mon gonfanon blanc,
Mas per aisso m'en soffrisc e m'en parc
Qe n'Oc e Non vei que un dat mi plomba.
Mas non ai ges Lezinan ni Rancom,
Q'ieu puosca loing osteiar ses aver!
Mas aiudar puosc de mos conoissens,
L'escut al col e capel en ma testa.

Si.l reis Felips n'agues ars' una barga
Denan Guiortz, o crebat un estanc,
O a Roam intres per forss' el parc,
Que l'asetges pel puoig e per la comba
C'om no.n pogues traire breu ses colom,
Adoncs sai eu q'el volgra far parer
Carle que fon del mieills de sos parens,
Per cui fon Poill' e Sansoigna conqesta.

Anta l'adutz e de pretz lo descarga
Gerra, cellui cui hom no.n troba franc,
Per q'eu non cuich, lais Caortz ni Cajarc
Mon Oc e Non, pois tant sap de trastomba.
Si.l reis li da lo thesaur de Chinom,
De gerr' a cor, et aura.n pois poder.
Tant l'es trebaills e messios plazens
Qe los amics e.ls enemics tempesta.

Anc naus de mar, qand a perdut la barga
Et a mal temps e.is vol virar al ranc
E cor plus fort d'una saieta d'arc,
E.is lev' en aut e puois aval jos tomba,
Non trais anc pieitz, e dirai vos ben com,
Q'ieu fatz per lieis, que no.m vol retener,
Qe no.m manten jorn, terme, ni covens,
Per qe mos jois, q'era floritz, bisesta.

Vai, sirventes, ades tost e correns,
A Trainac sias anz de la festa.

Di.m a.n Rotgier et a totz mos parens
Qe no.i trob plus omba ni om ni esta.