A totz dic qe ja mais non voil
Viure ni ja joi non aurai
Tan gran con lo jorn q'ieu morrai!
Pos sai hai mon Rassa perdut,
Lai lo volri'aver cobrat.
Ai segner, car ses vos remain
Totz temps n'aurai lo cor irat
Duscha qe vos aia segut.

Lo cors mi remet e li oill
Per l'aiga qi davall'e vai
Per la dura dolor q'ieu trai,
Segner, pos m'agron mentagut
C'ab se vos avia menat
Lo Segner cui servon li sain,
Cui pregem tuit per sa bontat
Qe ab se vos guit a salut.

Verais coms, Alixandres voil
Qe.us fassa compagnia lai!
Ogiers e Raols de Canbrai,
Rolantz ab tota sa vertut
Et Oliviers son aizinat,
Estols, Naimes ab n'Oristain,
Guillens d'Aureng'e.l plus prezat
Qe del miels del mont son crezut.

De Lerida jusq'a Vernoil
Ni dal Far tro qu'a Roncisvai
Ni d'outra la mar ni de zai
Non portava princeps escut
Tan s'agues de bon pretz levat.
Q'em breu no.n valgr'argenz estain,
Tan l'omen n'agron en plantat
Qe tornat l'avi'en rivut.

S'Artus, lo segner de Carduoil
Cui Breton atendon e mai,
Agues poder qe tornes sai,
Breton i aurian perdut
E nostre Segner gazagnat.
Si lor i tornava Galvain
Non lur auria esmendat
Qe mais non lur agues tolut.

Sa honor fara si l'acoill
En sa cort, qar anc non hac mai
Tan ric ni aitan bon eschai,
Ni tant ara de pres agut.
Qe si dont eron descujat
Escen e sobrier e main,
El retenia doble grat
D'aqelz qi l'avion vezut.

Prez es jos del auzor capdoil
Pel conte qe tenia.l rai,
E jovenz tornatz en esmai.
Perdut an lor capdel li drut
E.il ric torneiador prezat,
Joglar e soudadier estrain,
E donas lo miels ensegnat
E prestador lo plus crezut.

Lo reis dels reis per sa vertut
Retenga lo conte prezat
Dont totz lo monz sospir'e plaing,
Pos l'autre segle n'a ornat
Et aqest de sai dechaut.