Un sirventes on motz non faill
Ai faich, c'anc no.m costet un aill.
Et ai apres'un'aital art,
Qe s'ai fraire, cosin ni qart,
Eu.l part l'ou e la meailla.
E puois s'il vol la mia part,
Eu l'en get de comunailla.

Tot jorn contendi e.m baraill
Escrim e.m defen e.m coraill,
C'om me fond ma terra e m'art,
E.m fai de mos arbres issart,
E mesclo.l gran am la pailla.
E no.i a volpill ni coart
Enemic que no m'asailla.

Talairans non trota ni.n saill,
Ni non hieis de son arandaill,
Ni non dopta lanssa ni dart.
Anz viu a guisa de coart.
Et es tant ples de nuailla,
Greu m'es qan l'autra gens se part,
Et el s'esten e badailla.

Guillem de Gordon, fol bataill
Avetz mes dinz vostre sonaill -
Et eu am vos, si Dieus mi gart.
Pero per fol e per musart
Vos tenon d'esta fermailla
Li dui vescomt'et es lor tart
Que siatz en lor batailla.

Tot mon sen teing dinz mon seraill,
Sitot m'ant mes en gran trebaill
Entre n.Azemar e.n Richart.
Lonc temps m'ant tengut en regart,
Mas ar lor mou tal barailla,
Qe li enfan, si.l reis no.ls part,
Auran part en lur corailla.

A Peiregos pres del muraill
Tant cant poirai gitar ab maill,
Volrai anar sobre Baiart.
E se.i trob Peitavin pifart,
Sabra de mon bran cum tailla
Que sus el cap li farai bart
De cervel mesclat ab mailla

Tot jorn resoli e retaill
Los barons e.lz refon e.lz caill.
Q'ie.ls cujava metr'en eissart,
Per q'ieu sui fols car m'i regart.
Qu'ill son peior per obrailla
Que non es lo fers Sain Leonart,
Per qu'es fols qui s'en trebailla.

Baron, Dieus vos sal e vos gart
E vos aiut e vos vailla,
Ab sol que digatz a.n Richart
So qe.l paus dis a la grailla.