Molt m'es dissendre car col
De gerra far ab castel
E car assaut ni cembel
No.m vim mais aura d'un an.
E teng m'o a grand affan
Car il n'estan per paor --
E nos autre per amor --
Del seignor de Molierna.

Be.ls agusa e.ls amol
E.ls tocha coma coutel,
.......................................
Mas trop son espes denan
E mol devas lo trenchan.
E plus leial d'un prior,
Merce de l'esmoledor,
Tuich venran a vita eterna.

Ja.n Berlay de Mostairol
Ni.n Guillem de Monmaurel
Non agran cor tan yrnel
Qom nostre baro quad'an
Quan son a l'yvern intran
E quan son a la chalor.
Torna l'arditz en doussor
Quan lo clars temps s'esbuzerna.

Del seignor de Mirandol
Que ten Crueissa e Martel
Non cre ogan se revel
Tro que veia que faran
Frances que van menassan!
E non son tant gabador.
Ben non atendo.l pascor
Car oimais plou et inverna.

Aragones fant gran dol,
Catalan, e cill d'Urgel
Car non an qui los chapdel
Mas un seignor flac e gran
Tal qe.is lauza en chantan
E vol mais deniers q'onor.
E pendet son ancessor
Per qe.is destrui et enferna.

Pos lo coms Richartz mais vol
Benaujes sai pres Bordel
Qe Conhat ni Mirabel
Ni Chartres ni Sain Joan
Grieu cobrera Botenan
Ni feira a son sengior
Braias moillar per paor.
Per q'ieu crei, Merlis l'esquerna

Lai vir on la denz mi dol
Vas cella de cui m'es bel
Q'ieu la repti, e l'apel
De tracion e d'engan,
Car per son leugier talan
Sofre que fals feignedor
S'anon feignen de s'amor
De lieis que bon pretz governa.

Eu sai un austor tersol
Mudat, c'anc non pres auzel,
Franc e cortes et isnel,
Ab cui eu m'apel Tristan.
E tot per aital semblan
A.m pres per entendedor
Et a.m dat mais de ricor
Que s'era reis de Palerna.

Tristan, per la vostr'amor,
Mi veiran torneiador
En Peitau -- qui qe.m n'esqerna.

Mas la regina d'amor
M'a pres per entendedor.
Be puesc far cinc et elh terna.