Mailolin, joglars malastruc,
Pos acomdat m'a hom de vos
E mi venes qerre chansos,
En talent ai q'ie.us en vailha.
Qar iest avols e semblas bos
Mieills fora foses campios
Qe viure d'autrui corailha.

Aital solatz m'aves faissuc
Q'autr'oms en seri'enuios,
Ez es plus nescis qe montos
E canta plus clar li grailha.
Porc q'om regarda millargos
Fai meilhor escoutar qe vos
O nafrat qan hom lo tailha.

Qi.eus apellava paoruc,
Semblaria qe vers non fos.
Qar iest granz e joves e tos,
Fas semblan q'aias corailha,
Mas lai on lebres es leos
Vos est vollpills e nuailhos,
Flacs ses tota defensailha.

Dedintz iest plus caus d'un sauc
Ez a.s maior cor uns soiros.
Mas le feges et le polmos
Es grans sotz la cabecailha,
Ez iest de matin someilhos,
Qe qi.eus sona un mot o dos,
Fas semblan qe no.s en cailha.

Mal vos tenen per asertuc
D'armas en la ost dels basclos,
Qe un non hi a dels garcos
Qe denan vos non assailha.
Si.s defendian ab melos
Cascus intrer'i anz qe vos
S'avias elm e ventailha.

Lai on sentes raustir montos
Vos fas de l'intrar plus cochos
Q'al pal ni a la serrailha.

E non es tan grans le roinhos
Q'en un sol morsell o en dos
Non ll'enpasses qi.l vos tailha.

Raimon de Planell qar es pros,
Vueilh q'auia.l sirventes de vos
E.l sons iesca.n ab trebailha,

Car sordei chantatz qe paos
E gavainhatz los motz e.ls sos
Per qe.s folls qi los vos bailha