Qan vei pels vergiers despleiar
Los cendatz grocs, indis e blaus,
M'adoussa la votz dels cavaus
E.il sonet que fant li joglar
Que viulon de trap en tenda,
Trombas e corn e graile clar!
Adoncs vuoill un sirventes far,
Tal qe.l coms Richartz l'entenda.

Ab lo rei mi vuoill acordar
D'Aragon, e tornar en paus,
Mas trop fon deschausitz e braus
Can venc sai sus per osteiar!
Perqe.s dreitz q'eu l'en reprenda.
Eu o dic per lui chastiar
E pesa.m si.l vei folleiar,
E vuoill qe da mi aprenda.

A mi.l volon tuich encusar,
C'us mi comdet de sos vassaus
Qe de Chastellet ac mal laus
Qan ne fetz n'Espaignol gitar.
E no.m par que si deffenda
Vas lui, si el n'ausa proar!
E qand intret per covidar
Conqueri lai pauc de renda.

Oimais non li puosc ren celar,
Anz li serai amics coraus!
Gastons, cui es Bearns e Paus,
Mi trames sai novas comtar,
Que de sos pres pres esmenda
Del rei, qe.ls i degra liurar,
E volc en mais l'aver portar
Que hom totz sos pres li renda.

Que so m'ant dich de lui joglar,
Q'en perdon ant faitz totz lur laus!
S'anc lor det vestirs vertz ni blaus
Ni lor fetz nuill denier donar,
Laich l'es c'om l'en sobreprenda.
Que d'un sol s'en saup ben pagar,
D'Artuset, don fai a blasmar,
Qe.n mes als Juzieus en venda.

Peire Joglar saup mal pagar
Qe.il prestet deniers e cavaus,
Qe la vella, que Fons Ebraus
Aten, lo fetz tot pesseiar --
C'anc l'entresseins faitz ab benda
De la jupa del rei d'armar
Qe.ill baillet non lo poc guizar
C'om ab coltels tot no.l fenda.

Peire Rois saup devinar
Al prim qe.l vi, joves reiaus,
Qe no seri'arditz ni maus,
E conoc o al badaillar!
Reis qui badaill ni s'estenda,
K Qant au de batailla parlar
Sembl'o fassa per vaneiar
O q'en armas non entenda.

Eu lo.il perdon si.m fes mal far
A Catalans ni a Laraus.
Pos lo seigner cui es Peitaus
Lo.il mandet, non auset als far!
E reis qui logier attenda
De seignor, be.l deu affanar.
Et el venc sai per gazaignar
Mais qe per autra fazenda.

Vuoill sapcha.l reis et aprenda
De son grat e fassa chantar
Mon sirventes al rei navar,
E per Chastella l'estenda.