Pois lo gens terminis floritz
S'espandis gauzions e gais,
M'es vengut en cor que m'eslais
De far un novel sirventes
On sapchont li Aragones
C'ab mal agur -
D'aisso sion ill tuich segur -
Sai venc lo reis, don es aunitz,
E siei soldadier logaditz.

Sos bas paratges sobrissitz
Sai que fenira coma lais,
E tornara lai don se trais:
A Meillau et en Carlades.
Qand qecs n'aura son dreich conques
Ant s'en vas Sur
Greu er que en mar no.l debur
L'aura, car es tant pauc arditz,
Flacs e vans e soiornaditz.

Proenssa pert, don es issitz,
Qe son frair Sanson prezon mais!
Qu'el non a soing mas que s'engrais
E beva per Rossillones,
Don fo deseretatz Jaufres.
Q'a Vilamur,
En Tolsa.l tenon per preiur
Tuich cill ab cui s'era plevitz,
Car los a per paor giquitz.

Lo reis cui es Castrasoritz
E ten de Toleta.l palais
Lau que mostre de sos eslais
Sai al fill del Barsalones,
Car per dreich sos malvatz hom es.
Del rei tafur
Pretz mais sa cort e son atur
Non fatz cella don fui trahitz
Lo jorn q'el fon per mi servitz.

Lo bons reis Garsia Ramitz
Cobrera, qan vida.il sofrais,
Aragon, qe.l monges l'estrais!
E.l bons reis navars, cui dreitz es,
Cobrara.l ab sos Alaves,
Sol s'i atur.
Aitant qant aurs val mais d'azur
Val meills, e tant es plus complitz,
Sos pretz que del rei apostitz.

Per cella de cui es maritz,
Per la bona reina.m lais,
E des qe.m dis so don m'apais.
Berengiers de Besaudunes
Li retraisera, si.l plagues,
Mas tot recur
Sos malvatz faitz, que son tafur,
Car per el fo mortz e trahitz,
Don es sos lignatges aunitz.

Mout trahi laich l'emperairitz
Cum fals reis preiurs e savais,
Qand pres a qintals et a fais
L'aver que Manuels trames,
E la rauba e tot l'arnes.
Pois ab cor dur,
Qand n'ac traich lo vert e.l madur,
El n'enviet per mar marritz
La dompn'e.ls Grecs q'el ac trahitz.