S'abrils e fuoillas e flors
E.il beil maitin e.il clar ser
D'un ric joi en cui esper
No m'alegron, et amors
E.il rossignolet c'auch braire
E.l nous temps vertz e grazitz
Qe.ns adutz jois et dousors,
E.l coindes pascors floritz
Midonz son ardit non creis
E no.il merma l'espavens,
Tart m'en venra gauzimens.

Dompna, s'ieu quisi socors
Ailors, non o fis en ver.
E ve.us m'al vostre plazer,
Mi e mos chans e mas tors.
E pren comjat del repaire
On tant gen fui acuillitz
On nais jois, sens e valors.
E cel qe manten faiditz
Per honor de si mezeis,
Qan fant bos acordamens
Asols los affiamens.

Vostre reptars m'es sabors,
Ric, car cuidatz tant valer
Qe ses donar, per temer,
Volriatz aver lauzors.
E s'om no.us auses retraire
Qand us fai qe deschausitz,
E semblaria.m paors
Si n'era per mi cobritz --
Coms ni vescoms, ducs ni reis.
Mas faitz vostres faitz tant gens
Qe.us en sega digz valens.

Us n'i a gerreiadors
Que ant de mal far lezer
E no.is sabon captener
Nuil temps ses engignadors.
Tant amon lanssar e traire,
E vei los totz temps garnitz
Coma vivian de cors.
Per q'eu no lur sui aizitz,
C'anc a bon pretz non ateis
Rics hom, si jois e jovens
E valors no.il fon guirens.

Autres n'i a cassadors
Per la costuma tener
Qe.is fant ric home parer,
Car amon cans et austors
E corn e tabor e laire.
Q'es lor pretz tant frevolitz
Et ant tant pauc de valors
E llor poders tant frezitz
Que res mas besti'o peis
Non lor es obediens
Ni fai lor comandamens.

D'autres n'i a bastidors,
Rics homes de gran poder
Que sabon terra tener
E fant portals e bestors
De cauz, d'arena ab caire.
E fant tors, voutas ab vitz.
E vei los bons manjadors
Don fant lur dons plus petitz,
E ges bons pretz non lur creis
Car aitals captenemens
Non val mest las bonas gens.

Ges, dels rics torneiadors,
Si tot se gaston l'aver
No.m podon al cor plazer
Tant los vei galiadors.
Rics om qui per aver traire
Sor torneiamenz plevitz
Per prendre sos valvasors --
Non l'es honors ni arditz.
Mas uns non extreign coreis,
Sol q'ab el s'en an l'argenz
S'om pois s'en es mal dizenz.

Ric home voill q'ab amors
Sapchan cavaliers aver
E qe.ls sapchan retener
Ab ben far et ab honors
E qe.ls trob om ses tort faire,
Francs e cortes e chauzitz
E larcs e bos donadors.
Q'aissi fo prez establitz:
Q'om guerreies ab torneis
E Qaresma ez Avenz
Fesson soudadiers manenz.

Na Tempra, jois m'es cobitz
Tant qe ab hora pareis
Qe fels mesclatz ab ascenz
M'es endevengutz pigmenz.
Rassa, non sui margeritz
Anz es tan ferma ma leis
Qe s'anc jorn fui recrezenz,
Ara m'en sui reprendenz.

Papiols, fis tan arditz,
Pren mon chant e vai ab eis
A n'Oc e Non! qe prezenz
Li fatz de mantz motz corenz.