Ieu chan, que.l reys m'en a preguat
A l'auzen de mon menassat,
De l'afar d'aquesta guerra,
D'aquest juec que vey entaulat.
E sabrem quant l'auran joguat
Dels quals dels filhs er la terra.

Tost l'agra.l reys joves matat,
Si.l coms no.l n'agues essenhat.
Mas aissi.l clau e.l enserra
Qu'Enguolmes a per fort cobrat
E tot Centonge deliurat
Tro lai part Finibus Terra.

Si.l coms pot far sa voluntat
Que no.l vendon cyst afiat,
Ni del tot si dezenferra,
Qu'anc cynglar no vim pus irat
Qan l'an brocat ni l'an cassat
Q'elh er. mai sos cors non l'erra

De mo ssenhor lo rey annat,
Conosc que an siey filh peccat
Que del sojorn d'Anglaterra
L'an ahoras dos ans lunhat.
Del tot lo.n tenh per enguanat
Mai quan de Johan-ses-Terra.

Li Gascon si son acordat
Entr'elhs e ves lui revelat
Quon aissilh de Lombardia.
Mai volon esser be menat
Per rey que per comte forssat.
D'aitan lur trac guarentia.

Aquest juec tenc per guazanhat
Deves nos e per revidat.
Que dels pezos de Valia
Avem l'escachier desliurat!
Que tug n'aneron esfredat --
Ses comjat, q'us non prendia.

En Lemozi fon comensat
Mas aillors sera afinat.
Qu'entre Frans'e Normandia,
Ves Giortz e ves Nuoumercat
Vuelh qu'en auian cridar Arrat
E Mon Joy e Deus aia

Lo sen venserem ab foudat,
Nos Lemozin, et envezat
Que volem qu'om do e ria.
Que.ls Normans en son enuiat
E dizon si.s n'eron tornat
Q'uns mais d'elhs sai non venria.

Lo rey tenc per mal cosselhat
De Fransa e per piegz guizat
Quar vey que sos fagz estanha
Que li valrion mais daurat.
E si no val a son conhat,
Sens e pretz tem que.l sofranha.

Frances, si quon es abdurat
Sobre totz, e li plus prezat,
Paresca q'us non remanha
Companh que.l reys aia mandat.
Que jamais no seretz prezat
Si non etz en la mesclanha.

Lo dux de Berguonh'a mandat
Qu'el nos aiudara l'estat
Ab lo secors de Campanha,
On venran tal cinc cen armat
Qe, qan tug serem aiustat,
Non er Peitieus no ss'en planha.

Reys qui per son dreg si combat
A mielhs dreg en sa eretat:
E quar conquerec Espanha
Charles, n'a hom tos temps parlat.
Q'ab trebalh et ab larguetat
Conqier reys pretz e.l guazanha.

Senh'en Rassa, aquest comtat
Vos cresca.l reys ab Bretanha.

Pueis seran drut enparegat
A Montignac en Cocagna.

Lo reys joves s'a pretz donat
De Burcx tro qu'en Alamanha.