Un sirventes fatz dels malvatz barons,
E ja mais d'els no m'ausiretz parlar!
Qu'en lor ai fraiz mais de mil agulions,
Q'anc no.n puoic far un correr ni trotar --
Anz se laissen ses clam deseretar.
Maldiga.ls Dieus e que cuian doncs far
Nostre baron c'aissi com un confraire,
No i es uns, ne.l poscatz tondr'e raire
O ses congrenz dels quatre pes ferar.

Lous e n'Aimars, n'Aquenbautz e.n Guions
Degran oimai lor joven demostrar,
Quar joves rics cui non platz messios,
Cortz, ni guerra, non pot en pretz montar,
Ni.s fai temer ni grazir ni onrar.
. . . . . . . . . . . . .
Que da Londres tro qu'a la ciutat d'Aire
Non i a un qu'en la terra son paire
No.ill fasson tort senes tot caloingnar.