D'un sirventes no.m cal far loignor ganda,
Tal talan ai qe.l dig'e qe.l espanda!
Car n'ai razon tant novell'e tant granda
Del joven rei q'a fenit sa demanda
Sos frair Richartz, pois sos paire.l comanda.
Tant es forsatz
Pois n'Aenrics terra non ten ni manda,
Sia reis dels malvatz

Que malvatz fai, car aissi viu a randa
De liurazon a comt'et a garanda.
Reis coronatz que d'autrui pren liuranda
Mal sembl'Arnaut, lo marques de Belanda,
Ni.l pro Guillem que conquis Tor Mirmanda.
Tant fon presatz
Pos en Peitau lor ment e lor truanda,
No.i er mais tant amatz.

Ja per dormir non er de Coberlanda
Reis dels Engles, ni conqerra Yrlanda,
Ni tenr'Angieus ni Monsaurel ni Canda,
Ni de Peiteus non aura la miranda,
Ni sera ducs de la terra normanda,
Ni coms palatz
Ni de Bordels ni dels Gascos part Landa,
Seigner ni de Basatz.

Conseill vuoill dar el son de n'Alamanda
Lai a.n Richart, sitot no lo.m demanda:
Ja per son frair mais sos homes non blanda.
-- nonca.is fai el, anz asetg'e.ls aranda,
Tol lor chastels e derroc'et abranda
Devas totz latz
E.l reis tornei lai ab cels de Guarlanda
E l'autre, sos coignatz.

Lo coms Jaufres cui es Bersilianda
Volgra fos primiers natz,

Car es cortes, e fos en sa comanda
Regesmes e.l duchatz.