Pois Ventedorns e Comborns ab Segur
E Torena e Monfortz ab Gordo
Ant faich acort ab Peiregos e jur,
E li borzes si clauen deviron,
M'es bel q'ieu chant e que m'en entremeta
D'un sirventes per lor assegurar.
Q'ieu non vuoill ges sia mia Toleta,
Per q'ieu segur non i pogues estar.

Ha Puoig Guillem e Clarent e Graignol
E Saint Estier, mout avetz grand honor,
Et eu meteus, qui conoisser la.m vol,
Et a sobrier totz Engolmes maior
D'en Charretier que guerpis la charreta
-- non a deniers ni no.n pren ses paor --
Que ab honor pretz mais pauca terreta
Q'un gran empier tener ab desonor.

Si.l rics vescoms que es caps de.ls Gascos,
A cui s'aten Bearns e Gavardans,
E.n Vezians si.s vol, e.n Bernardos,
E.l seigner d'Aics e cel cui es Marsans,
D'aqesta part aura pro.l coms que fassa,
Et eissamens, aissi cum el es pros,
Ab sa grand ost q'atrai e que amassa,
Poie s'en sai et ajoste.is ab nos.

Si.n Taillaborc e.n Ponz de Lezinans
E Malleos e Taunais fos en pes,
Et a Siurac fos vescoms vius e sans,
Ja non creirai que non nos aiudes.
Cel de Toartz, pois lo coms lo menassa,
Tenga.s ab nos, e non sia ges vas!
E demandem li tro que dreich nos fassa
Dels homenes qe.ns a traitz d'entre.ls mans.

Entre Peitau e la Ysla Bochart
E Mirabel e Laudun e Chinon
A Claraval ant bastit ses regart
Un bel chaslar e mes en plan chambon.
Mas non vuoill ges lo sapcha ni lo veia
Lo reis joves, car no.il sabria bon!
Mas paor ai, pois que tant fort blancheia,
Q'el lo veira ben da Matafellon.

Del rei Felip sabrem ben s'il paireia
O s'il segra.l bon usatge Carlon
D'en Taillafer, qe per seignor l'autreia
D'Engolesme, don el l'en a fait don.

E non es dreitz de rei qe ren autreia,
Pos a dich d'oc, qe mais diga de non.